TEATRO ESCOLAR

Hoxe celébrase o 
Día Internacional do Teatro.

Dende o curso 93-94 o centro vén desenvolvendo esta actividade extraescolar (baixo a direción do profesor Vicente Míguez) con ensaios ordinarios todos os xoves de 5 a 6 da tarde. A fin de curso represéntanse as obras, primeiro no colexio e logo, para os pais e público en xeral, no Centro Sociocultural (Casa do Forno). Ás veces tamén temos saído co teatro para actuar no Club de Xubilados de Viveiro, no Asilo, no Xeriátrico, nas festas patronais de Celeiro e de Covas, e sobre todo, no Teatro Pastor Díaz.

Este ano son 23 alumn@s os que participan nesta actividade que tén como obxectivos explorar as capacidades psicomotrices, traballando a vocalización, a memoria, comunicación cara ao público, autoestima, socialización e posta en escena. De paso, transmítese un valor cultural aos nen@s.

Entre outras obras de teatro téñense representado os seguintes títulos: E por riba o sol, Reality a chou, Os tres Reis Malos, Piratas de Caribe, Casa Macho e Mamma mía, que circo! Este curso escenificaremos Pasatempos.

Rincón da Bibliosoños

Libros de poesía para a Hora de Ler:

Traballando a Poesía

Este ano para conmemorar o DÍA DA POESÍA imos levar a cabo unha actividade relacionada tamén co DÍA DA ÁRBORE:

"APADRIÑA UNHA ÁRBORE"

Cada curso elixirá unha árbore das que temos no entorno do noso colexio e adicaralle unha poesía, ben de creación propia ou de autor coñecido e ademais faralle unha ilustración.

Cos traballos faremos unha exposición e logo con algúns dos poemas seleccionados elaboraremos un pequeno libro.

Tamén faremos unha sesión de recitados a carón das árbores apadriñadas o venres, 21 de marzo.

• 4º Infantil: Camelio
• 5º Infantil: Limoeiro
• 6º Infantil: Oliveira
• 1º curso: Loureiro
• 2º curso: Castiñeiro
• 3º curso: Acivro
• 4º curso: Pereira
• 5º curso: Carballo
• 6º curso: Níspero
• Aula de Inglés: Piñeiro
• Aula de Música: Roseiras e plantas en xeral.

Traballo documental

Os alumnos e alumnas do 3º ciclo veñen de presentar os seus traballos realizados despois da saída para visitar a lonxa de Celeiro, dentro do programa "Mariñeiros por un día".

Fomento da lectura

Hoxe levamos a cabo dúas actividades coas que intentamos fomentar a lectura entre os noso alumnado:

• Por un lado os alumnos e alumnas de 4º curso renovaron as súas "mochilas viaxeiras" con novos libros e materiais para que sigan disfrutando da lectura en familia.
• Tamén fixemos entrega dos e-reader (lector electrónico) nas aulas de 5º e 6º curso, acompañada dun díptico informativo e dunha breve explicación por parte das responsables das TIC e da Biblioteca Escolar.

Esperamos que estas accións servan para fomentar o gusto pola lectura!!!

Poñemos en marcha os libros electrónicos

Asistimos na actualidade a importantes cambios na forma de presentar os textos e de acceder á súa lectura, coa incorporación de novos soportes e novos artefactos (lectores electrónicos, tabletas, e outros), que cómpre ir introducindo na biblioteca escolar, co fin de que o alumnado poida coñecer de primeira man, e coa orientación do profesorado, os novos soportes.

Porén, a incorporación dos lectores electrónicos nas bibliotecas conleva certa complexidade, pois a industria editorial e a industria tecnolóxica está aínda probando soportes e formatos, e procurando solucións a problemas que se presentan. Unha das incógnitas por resolver é a mellor fórmula para realizar os préstamos de lectores e de libros electrónicos no contexto específico das bibliotecas dos centros de ensino. Entre tanto, é desexable que o noso alumnado teña acceso a estes soportes e que o profesorado poida probar as posibilidades que ofrecen, na mellora da competencia lectora e no de- senvolvemento de hábitos de lectura, ámbolos dous obxectivos do Proxecto Lector de Centro.

Comezamos a nosa andaina poñendo en marcha este tipo de lectura nos cursos do 3º ciclo.

Na presentación podemos ver a información que recibirán os alumnos e alumnas.

Anxo Moure no colexio

Hoxe, despois do recreo, imos ter dúas sesións (unha para Infantil e 1º curso e outra os demáis cursos de primaria) co contador de contos ANXO MOURE que nos presentará  o libro:

"A XACIA LUVIÑAS"

A historia ensina aos nenos e nenas a non pelexarse, a coidar dos ríos e sobre todo a acariciar. Conta as lendas que os xacios e as xacias son seres medio humanos, medio peixes, que vivían nos pozos dos ríos.

Xa chegou o mes de marzo!

Remataron os días de Entroido e voltamos ás clases.
Neste mes de marzo imos ter moitas celebracións:

• 8 de marzo, Día da Muller Traballadora
• Do 10 ao 14 de marzo, Semana da Prensa na Escola
• Día 21 e 22 de marzo, Día da Árbore e da Auga
• Día 21 de marzo, Día Mundial da Poesía
• Día 27 de marzo, Día Mundial do Teatro

Hoxe é o gran día!!!

Venres, 28 de febreiro:

Chegamos ao colexio con moita  ilusión pois imos estar de festa, bueno, primeiro toca traballar un pouco!!!, e a partir das 11:30 horas, celebraremos a nosa particular "Festa de disfraces do Entroido". (Este ano xirarán en torno ao Antigo Exipto)

 Este é o programa:

• Merendola con larpeiradas antroideiras e chocolate, para poñer bon corpo!
• Desfile polas rúas do Chao, se vai bo tempo; se chove farémolo no Pavillón do colexio "Enrique Basanta".
• Ao regresar, no patio do colexio, cantaremos as cancións que estivemos preparando esta semana:
• Canción do Entroido.
• A maxia do Carnaval.
• As momias de colores
• Drilo, o crocodrilo.
•  A continuación, pasarémolo moi ben facendo o "Baile da escoba".
• Tamén teremos tempo para xogar e disfrutar dos nosos disfraces.

NESTE ENLACE PODEMOS VER MOITA MÁIS INFORMACIÓN E O VÍDEO DA FESTA

O pavillón do colexio xa ten nome: Enrique Basanta

O pasado sábado, 22 de febreiro levouse a cabo a colocación da placa que dá nome ó pavillón escolar de Celeiro: Pavillón Enrique Basanta. O nome non se debe só á grandeza de corazón de Quique, non só a unha expresión de afecto para quen colaboraba anonimamente coas escolas deportivas, senón por un acto de xustiza coa xente de ben que fai pobo.  
Con numerosísima presenza de autoridades, representantes de Educación, familiares e veciñanza asistimos a un acto emotivo que presentou Jesús Timiraos Teixeira como Presidente das Escolas Deportivas e no que interviron Antonio Ferreiro, director do colexio Pedrosa Latas, e María Loureiro, alcaldesa de Viveiro, quen descubr¡ría a placa entre o emocionado aplauso do público.

 Enlazamos co vídeo que realizaou o veciño de Celeiro, José Antonio Abella. Moitas grazas polo teu traballo

Día de Rosalía de Castro

O luns, 24 de febreiro, celebramos o día de Rosalía de Castro. Ese día pasaremos pola Bibliosoños para facer unha celebración máis especial pero, xa levamos días preparando os traballos como este vídeo especial do poema "Pasa, río, pasa, río" do seu libro Cantares Gallegos.

NESTE ENLACE PODEMOS VER TODAS AS ACTIVIDADES

Centenario de Xosé María Díaz Castro

O mércores 19 de febreiro celébrase o centenario do nacemento do poeta Xosé María Díaz Castro, a quen este ano se lle adica o Día das Letras Galegas.

Na Bibliosoños xa temos unha páxina adicada a súa figura e obra, podemos vela neste enlace:

XOSÉ MARÍA DÍAZ CASTRO

Teatro no colexio

Hoxe  os alumnos e alumnas de Primaria poidemos disfrutar  dunha sesión de Teatro por xentileza da Editorial Santillana.

A obra titúlase "A súa vida".
Compañía: Leda Teatro.

Que ben o pasamos! Foi unha representación estupenda!!!

Rincón das Celebracións

Na seguinte presentación de fotos podemos ver o Rincón das Calebracións:

• 21 de febreiro, DÍA INTERNACIONAL DA LINGUA MATERNA
• 24 de febreiro, DÍA DE ROSALÍA DE CASTRO
• 28 de febreiro, Festa de Entroido no Colexio.

Día Internacional da LINGUA MATERNA

Un ano máis, a Xunta de Galicia e a RDL súmanse á celebración do Día Internacional da Lingua Materna. Unha celebración que busca lembrarnos o valor das linguas, independentemente do número de falantes que teñan, para asegurar a diversidade cultural, contribuír ao coñecemento humano e potenciar a participación de todas as persoas na construción de sociedades democráticas.

Cada 21 de febreiro, a UNESCO chama a nosa atención sobre a importancia de usarmos e transmitírmoslles ás novas xeracións as linguas autóctonas de cada lugar e, este ano, destaca o seu papel como medios de acceso ao saber e de produción de coñecemento científico.

A mensaxe do Día Internacional da Lingua Materna 2014 é que todas as linguas humanas, e por suposto o galego, teñen o mesmo potencial para seren vehículo de investigación e de divulgación científica.

Mensaxe da directora xeral da UNESCO, Irina Bokova, con motivo do Día Internacional da Lingua Materna.

DÍA INTERNACIONAL DA LINGUA MATERNA

DÍA INTERNACIONAL DA LINGUA MATERNA

Dende o 21 de febreiro de 1952 celébrase o Día Internacional da Lingua Materna, coincidindo coa demanda dun grupo de estudantes en Bangladesh que reclamaba que a súa lingua materna, o Bangla, fose recoñecida como lingua oficial.

Para lembrar a importancia desta data  presentámosvos este vídeo de Manuel Bermúdez Blanco, do Equipo de Normalización Lingüística da Universidade de Santiago.

Xuntos podemos facer unha internet mellor

 Para traballar en familia
Clica na imaxe para ter máis información

O Día Internacional do Internet Seguro é un evento que se realiza cada ano no mes de febreiro, co obxectivo de promover en todo o mundo un uso máis responsable e seguro das tecnoloxías. Este ano é o 11 de febreiro de 2014.


Debemos reflexionar sobre a relevancia que o Internet ten na nosa vida.

Para logralo, hai varias configuracións e opcións de seguridade que garanten que a información e identidade dixital están no noso dominio.

Exposición no mes de febreiro

Máis libros novos que chegan á BIBLIOSOÑOS.

Vídeos das actividades no Día da Paz

VÍDEO DE FOTOS NA BIBLIOSOÑOS E NO XIMNASIO

VÍDEOS DAS CANCIÓNS E DANZAS

SOLTA DE POMBAS

Actividades no Día da Paz

Mariñeiros por un día

Singradura para escolares

(Crónica de Vicente Míguez)

Dentro da campaña que desenvolve a Confraría de Pescadores Santiago Apóstolo para achegar o mundo mariñeiro a escolares, este xoves 34 alumn@s do colexio de Celeiro, acompañados de dous profesores, asistiron a unha serie de actividades que lles ocuparon toda a mañá. Inciaron esta particular singradura nas oficiñas de Puerto Celeiro onde un operario da lonxa presentoulles as instalacións e dependencias da rula, detallándolles todo o proceso de comercialización do peixe, dende a descarga ata que se vende. Así mesmo, impartiu un clase práctica de distinción das especies mariñas máis comúns nos portos galegos, unha experiencia que viviron coa entrada no peirao da lancha “Playa de Cillero” que botou as capturas dunha boa marea diante do alumnado; o patrón atendeu ás preguntas plantexadas por algún neno explicándolles o arte de miños e trasmallos cos que faenan algunhas embarcacións de baixura.

Dentro da programación establecida visitaron a planta de viveiros onde gardan o marisco, asistiron a dúas charlas impartidas por Ignacio, que lles presentou o sublift, máquina para izar embarcacións de tonelaxe da baixura cando precisan reparación ou para servizo de mantemento.

Finalmente, no Centro Vicente Gradaílle, dous profesores de Salvamento Marítimo describiron cunha clase práctica as medidas de seguridade abordo así como a secuenciación nos casos de salvamento dunha embarcación.

A Confraría de Celeiro agasallou aos participantes con camisetas, material escolar ademais de información relativa ao mundo do mar,específicamente ao sector pesqueiro.

Pegatina para A PAZ

O xoves, 23 de xaneiro, rematou o prazo de presentación de traballos (debuxos e lema) para o concurso da pegatina que todos os anos facemos para conmemorar o "Día da Paz e Non Violencia".

Houbo moita participación e a elección foi moi difícil. Despois dunha dura deliberación a elexida foi a de Daniela Escudeiro, alumna de 2º curso. NORABOA!!!

Con todos os traballos fixemos unha exposición na entrada do colexio.

Poesía para a Paz

Na seguinte presentación podemos ver e ler algunhas das poesías máis fermosas que nos falan da PAZ E NON VIOLENCIA.

Traballo especial na Bibliosoños

Os alumnos e alumnas de 6º curso cantan e bailan a canción elexida para conmemorar o "Día da Paz e Non Violencia": SIYAHAMBA.

Novas páxinas de recursos

Para traballar nas aulas "A PAZ" elaboramos as nosas propias páxinas de recursos para poder acceder dun xeito máis sinxelo á información que precisamos.

Este curso engadimos unha páxina especial a NELSON MANDELA, e tamén a páxinas das "nosas cancións 2014"

Vídeo conmemorativo

Dende a Bibliosoños elaboramos este pequeno vídeo conmemorativo para o Día da Paz e Non Violencia, esperamos que vos guste

NESTE ENLACE PODEMOS VER MÁIS VÍDEOS 

DAS CELEBRACIÓNS DE ANOS ANTERIORES

Preparando as actividades "Día da PAZ"

a estamos moi animados preparando as actividades para conmemorar o "Día da Paz e Non Violencia", que celebraremos todos xuntos o xoves, 30 de xaneiro.

Na seguinte presentación podemos ver todo o que faremos:

Tamén vos deixamos as bases para a elaboración da pegatina

Máis libros novos para a Bibliosoños

No rincón das exposicións xa están os últimos libros que mercamos para a Bibliosoños.

Pronto estarán preparados para que os levedes ás vosas casas para ler e disfrutar deles.

Comezamos o 2º trimestre

Rematadas as vacacións de Nadal voltamos ás clases con moita ilusión e ganas de traballar...

Este 2º tremistre comeza o xoves, 9 de xaneiro e remata o venres, 11 de abril. Recordamos que o venres, 14 de febreiro é un dos días elexidos de libre disposición.

Durante este tempo faremos moitas actividades complementarias, saídas culturais, celebracións...

• 30 de xaneiro, Día da Paz e Non Violencia.
• 24 de febreiro, Día de Rosalía de Castro.
• 3, 4 e 5 de marzo, Tempo de Entroido.
• 8 de marzo, día da Muller Traballadora.
• Do 10 ao 14 de marzo, Semana da Prensa na Escola.
• 21 de marzo, Día Mundial da Poesía, Da Árbore e Da Auga.

E... seguiremos traballando no Proxecto Integrado de Dinamizacións "O Antigo Exipto".

O noso colexio na revista EDUGA

 

ACABA DE PUBLICARSE O Boletín Informativo curso 2013/14 nº 16 da Consellería de Cultura, Educación e Ordenación Universitaria, no mesmo ven publicado o noso proxecto traballado o curso pasado: "O MAR"

 

Proxecto O Mar

Un mar de cultura no CEIP Antonio Pedrosa Latas (Programa Terra) 

 

 

"Proxecto O Mar aposta por un modelo de escola empírica e interactiva que non só involucra a toda a comunidade educativa senón que logra unha viva inmersión no tecido social da vila, colaborando con asociacións culturais e de ocio, ademais de facer partícipe a cidadanía do porto de Celeiro".

E agora a descansar. Felices Vacacións!!!

Rematamos as clases do 1º trimestre e chegan as vacacións do Nadal, agora toca descansar para vir con novas forzas para seguir traballando moito.

Non vos olvidedes de visitar os blogs do colexio onde poderedes ver todo o que fixemos.

Aquí vos deixamos o último vídeo coas fotos das actuacións do Festival de Nadal e a chegada de Papá Noel.

Acto de Nadal na Casa do Forno

O luns, 16 de decembro, celebramos o Acto de Nadal coma todos os anos.

A ANPA do colexio fixo a entrega dos premios de Postais e Poesías do Nadal. Os premiados foron os seguintes:
4º Infantil, Nicholas Gibson Tostón.
5º Infantil, Noa Fernández Abad.
6º Infantil, Mar Vale López.
1º Primaria, Martina Gil Alfaro.
2º Primaria, Luis Fernández Lázaro.
3º Primaria, Nerea Salgueiro Rapa.
4º Primaria, Miriam Orbe Díaz (Postal) e Alba Rouco Iglesias (Poesía).
5º Primaria, Álvaro Fernández Lázaro (Postal) e Lia Sui Balseiro Otero (Poesía).
6º Primaria, Icía Míguez  Infante (Postal) e Iria Basanta Abella (Poesía).

Noraboa a todos os participante e en especial aos gañadores. O esforzo sempre ten recompensa!

No acto tamén actuou o Coro do Colexio.

No seguinte vídeo podemos ver unha reportaxe fotográfica.
MÁIS INFORMACIÓN NESTE ENLACE

Para fomentar a lectura en familia

Ler un conto aos nenos e nenas cada día ou regalarlles un libro nas ocasións especiais son algúns dos primeiros pasos que os pais poden dar para inculcar nos seus fillos pequenos o amor e o gusto pola lectura. Esta actividade estimularaos e axudaralles a desenvolver as súas competencias lingüísticas, pero tamén lles servirá de fonte para adquirir novos coñecementos e como ferramenta para progresar en todas as súas aprendizaxes.

Na seguinte presentación podemos ler sete pautas para fomentar a lectura 

"Calendario Especial"

"Días de Mar" é o calendario para o 2014 editado polo Colexio, no que se reproducen imaxes e textos que resumen o Proxecto Integrado de Dinamizacións do curso pasado "O MAR".

O calendario recolle memoria con estampas retrospectivas das transformacións sufridas na ría e no porto ao longo dos últimos cen anos; asemade inclúe unha homenaxe ao rol esencial das mulleres nas conserveiras, un repaso ás embarcacións que se usaron ao longo do século XX e tamén ás tripulacións dos barcos do porto Celeirense.

Máis libros novos para a Bibliosoños

O son da nosa fala na BIBLIOSOÑOS

Radio Lugo-Cadena Ser estará durante a mañá do mércores, 27 de novembro, na nosa Biblioteca gravando as voces dos nosos alumnos e alumnas, a través do programa "O Son da Nosa Fala". 

Esta idea orixinaria de Paco Nieto e Tania Lombao naceu no ano 2012 no que se celebrou o centenario do poeta de Celenova, Celso Emilio Ferreiro.

Este ano 2013 está adicado a Manuel María, finado hai xa 10 anos, e con elo queren apoiar a candidatura do poeta chairego para o Día das Letras Galegas do ano 2015.

Os poemas que van recitar son do libro Soños na Gaiola.

O programa emítese ás 13:55 e para poder escoitar aos nosos alumnos e alumnas podemos mirar na axenda do xornal El Progreso que nos dirá que colexio vai participar cada día.

Ao finalizar este proxecto editarase un Audio Libro no que se incluirán fotografías e as gravación dos poemas de todos os participantes.

25 de novembro

O 25 de novembro é o Día Internacional contra la Violencia de Xénero.

No colexio fixemos unha actividade que nos propuxo o CIM (Centro de Información á Muller) do Concello de Viveiro.

CIM de Viveiro. Páxina da Xunta (Mulleres de Galicia)
Claustro de San Francisco - Avenida de Cervantes, s/n
27850 Viveiro
Telf. 982 550 421
Correo electrónico: cim@viveiro.es

A actividade consistía en colocar nunha árbore follas cunha palabra, frase, lema, debuxo... en contra da VIOLENCIA DE XÉNERO. Participamos todos os ciclos.

Así de ben quedou a nosa árbore!!!

Hoxe celebramos o Día dos Dereitos da Infancia

Na Bibliosoños estamos de celebración pois hoxe é 20 de novembro, Día dos Dereitos dos Nenos e Nenas.

Preparamos unhas actividades especiais para os alumnos e alumnas de Infantil e tamén para o 1º ciclo de Primaria, nas que repasamos os  Dereitos e tamén falamos dos nosos Deberes.

Aprendimos moito! e para rematar a sesión cantamos todos xuntos a Canción dos Dereitos.

 

NESTE ENLACE TEMOS MÁIS INFORMACIÓN

Premio de Literatura en Lengua Castellana Miguel de Cervantes

Elena Poniatowska, escritora mexicana nacida en París, foi galardoada co premio Cervantes 2013. É a cuarta muller que recibe o premio, o máis prestixioso das letras hispanas. Antes conseguírono as españolas María Zambrano (1988) e Ana María Matute (2010) e a cubana Dulce María Loynaz (1992).

Elena Poniatowska naceu en Francia pero ao estalar a Segunda Guerra Mundial trasladouse coa súa nai a México mentres o seu pai participaba no desembarco de Normandía. A escritora incorporouse á vida mexicana sorprendéndose «pola pobreza que en Francia non vira». Comezou a escribir para un xornal nos cincuenta e, dende entón, non deixou de escribir en dous sentidos, no literario e no xornalístico. Consolidou a súa carreira ligada a este periodismo literario con obras como La noche de Tlatelolco (1971), sobre a matanza estudantil en Cidade de México.

O premio, considerado o Nobel das letras hispanas e creado en 1975 polo Ministerio de Cultura, está dotado con 125.000 euros e recoñece a figura dun escritor que co conxunto da súa obra contribuíse a enriquecer o legado literario hispano.

Aínda que non figura nas bases do premio, habitualmente cúmprese unha lei non escrita que reparte alternativamente, cada ano, o galardón entre Latinoamérica e España. Prevíase que no 2013 debería outorgarse o Cervantes a un escritor latinoamericano. Na pasada edición recaeu no escritor español José Manuel Caballero Bonald.

Máis sobre os Dereitos dos Nenos

Na Bibliosoños preparamos este GLOSTER que recolle os recursos que podemos utilizar para traballar estes días previos á Celebración do Día dos Dereitos da Infancia.

Libros para celebrar o Día dos Dereitos dos Nen@s

No rincón expositor hai libros que nos falan dos dereitos e deberes dos NEN@. 

Durante estes días previos ao 20 de novembro, Día dos dereitos da Infancia, poderemos coller estes libros para utilizalos nas aulas e na hora de ler.

Libros novos na Bibliosoños

Da colección  "O" de OQO editora vimos de recibir estes tres fermosos libros. 

Clica nas imaxes para ter máis información:

Premio Nacional do Cómic 2013

O autor Miguelanxo Prado foi galardoado co Premio Nacional do Cómic 2013 pola súa obra 'Ardalén', publicado por Norma en 2012 tanto en castelán coma en galego. O xurado destacou o carácter poético da súa obra, que mestura a realidade co sono, a memoria e o esquecemento, e a súa mestría técnica no uso da cor. O premio concedido polo Ministerio de Educación, Cultura e Deporte está dotado con 20.000 euros e ten como obxecto distinguir a mellor obra desta especialidade publicada en calquera das linguas do Estado durante o ano 2012.

E polo Samaín...

Coma en anos anteriores, fixemos dúas exposicións de cabazas disfrazadas, unha de Infantil e outra de Primaria.

Este ano as cabazas foron ata o Antigo Exipto e convertéronse en faraóns, momias, deuses...

Rematamos o mes de outubro celebrando a
 FESTA DO MAGOSTO 

 

Premio Nacional de Narrativa, 2013

O escritor José María Merino  (A Coruña, 5 de marzo de 1941- ),  obtivo o Premio Nacional de Literatura na modalidade de Narrativa coa obra «El río del Edén» (Alfaguara).

Libros novos para a Bibliosoños

Neste día tan especial:

DÍA DAS BIBLIOTECAS ESCOLARES

a nosa Biblioteca recibe libros novos para todos os ciclos e cursos do colexio.

    

E os alumnos fan Marcapáxinas Especiais.

Celebramos o Día das Bibliotecas Escolares

Vídeos  das actividades que levamos a cabo nos diferentes ciclos:

Bolsiñas para levar o libro á casa

Na semana do 21 ao 25 de outubro, levaremos a cabo moitas actividades na  BIBLIOSOÑOS, con motivo da celebración do Día das Bibliotecas Escolares (24 de outubro). Unha delas é a entrega das bolsiñas para levar o libro á casa.

As nenas e os nenos de infantil van encher rúas e corredoiras de cores vivas, as destas pequenas mochilas para gardar o libro que escollen na biblioteca escolar para ler na casa, e cos da casa. "Libros que van e veñen" é unha iniciativa encadrada no programa "Hora de Ler" para o fomento da lectura,  que busca apoiar ao profesorado no seu labor de implicación das familias nas actividades da biblioteca, e no empeño por conseguir que as nenas e os nenos desenvolvan hábitos de lectura.

Destinado ás familias, edítase un tríptico con orientacións e posibilidades de colaboración na casa e na escola, a través das actividades deseñadas pola biblioteca escolar.

As Mochilas Viaxeiras xa están preparadas

Os libros gustan da viaxe e da sorpresa, agardan nos andeis ou nos expositores por esa man que, ao abrilos, poña en funcionamento a maxia da lectura.

A mochila viaxeira está pensada para que, desde a Biblioteca Escolar, se poida organizar unha actividade que implique ás familias, e así proporcionar un motivo de encontro entre os distintos membros desta, tomando como motivo o mundo dos libros e da lectura.

A mochila é o soporte que permite aos rapaces e rapazas levar á súa casa, en préstamo temporal, uns materiais que reforcen o vínculo entre familia e escola na súa labor común para a formación dos lectores máis novos.

A fórmula para decidir quen se leva a mochila para a casa será variada: unhas veces por orde alfabética outras por sorteo ou por orde de petición...

En canto á periodicidade non sobrepasará dunha semana, tamén dependerá do número de alumnos e alumnas do curso.

Preparando as actividades para celebrar o Día da Biblioteca Escolar

O xoves, 24 de outubro, é o Día da Biblioteca Escolar, por iso, na BIBLIOSOÑOS estamos a preparar moitas actividades que podedes ler na seguinte presentación:

Xa hai Premio Nobel de Literatura 2013

A escritora canadense Alice Munro, considerada unha das voces máis importantes da literatura en lingua inglesa, converteuse na gañadora do Premio Nobel de Literatura 2013.

A Academia Sueca, ao anunciar o seu fallo, definiu a Munro como a "mestra do relato curto contemporáneo" e destacou que é aclamada polo seu "harmonioso estilo de relatar, que se caracteriza pola súa claridade e realismo psicolóxico".

Munro convértese na primeira escitora (ou escritor) canadense que gaña o máis importante galardón das letras mundiais dende a súa creación en 1901. Munro sucede no palmarés ao chinés Mo Yan.

Munro, de 82 anos e nacida en Wingham (Ontario), recibiu en 2009 o Man Brooker e foi finalista do Premio Príncipe de Asturias das Letras en 2011.

OBRAS:

• Dance of the Happy Shades, 1968, cuentos.
• Lives of Girls and Women, 1971, novela. Las vidas de las mujeres, Lumen, 2011.
• Something I’ve Been Meaning to Tell You, 1974, relatos entrelazados
• The Beggar Maid (aparecido antes como Who Do You Think You Are?), 1978, cuentos.
• The Moons of Jupiter, 1982. Tr.: Las lunas de Júpiter, De Bolsillo, 2010, cuentos.
• The Progress of Love, 1986. Tr.: El progreso del amor, RBA, 2009, cuentos.
• Friend of My Youth, 1990. Tr.: Amistad de juventud, De Bolsillo, 2010, cuentos.
• Open Secrets, 1994. Tr.: Secretos a voces, RBA, 2008, cuentos.
• The Love of a Good Woman, 1998. Tr.: El amor de una mujer generosa, RBA, 2009, cuentos.
• Hateship, Friendship, Courtship, Loveship, Marriage, 2001. Tr.: Odio, amistad, noviazgo, amor, matrimonio, RBA, 2007, cuentos.
• Runaway, 2004. Tr.: Escapada, RBA, 2005, cuentos.
• The View from Castle Rock, 2006. Tr.: La vista desde Castle Rock, RBA, 2008, relatos enlazados sobre su familia.
• Too Much Happiness, 2009. Tr.: Demasiada felicidad, Lumen, 2010, cuentos.
• Dear Life, 2012. Tr.: Mi vida querida, Lumen, 2013, cuentos.

Manuel Álvarez Torneiro, Premio Nacional de Poesía 2013

O poeta galego, Manuel Álvarez Torneiro, foi galardoado co Premio Nacional de Literatura na modalidade de Poesía pola obra Os ángulos dá brasa. O premio concédeo o Ministerio de Educación, Cultura e Deporte para distinguir a obra de autor español escrita en calquera das linguas oficiais do Estado e editada en 2012. Está dotado con 20.000 euros.

Manuel Álvarez Torneiro (A Coruña, 1932) traballou durante moitos anos no ámbito do periodismo. Escritor vinculado ao diario La Voz de Galicia, mantivo unha actividade poética ininterrompida dende o seu debut tardío coa obra Memoria dun silencio (1982).

A súa traxectoria inclúe os títulos Rigorosamente humano (1995, Premio Esquío); Luz de facer memoria (1999, Premio González Garcés e Premio da Crítica); Campo segado (2001); Epicentro (2003); Setembro Stradivarius (2004); Parábola do incrédulo (2006) e Os ángulos da brasa, publicado en 2012 na colección Tambo de Factoria K da editorial viguesa Kalandraka. Este poemario obtivo o Premio da crítica de poesía en lingua galega e o Premio Ánxel Casal.

Ler ciencia na Biblioteca Escolar

En breve chegará aos centros o cartel que a Consellería de Cultura, Educación e Ordenación Universitaria edita todo os anos para conmemorar o Día da Biblioteca (24 de outubro) e participar da celebración do mes da biblioteca escolar que propón a IASL (Internatioanl Association of School Librarianship). A biblioteca escolar é unha biblioteca específica e así se recolle na actual Lei de bibliotecas de Galicia, no seu artigo 31. Polos seus obxectivos, polos serivzos que presta á comunidade educativa, polo seu funcionamento, a biblioteca escolar, concebida como un centro de recursos de lectura, información e aprendizaxe, xenera contextos educativos fértiles para a adquisición de competencias clave para o alumnado que medra na sociedade da información e contribúe á adquisición de todas as competencias básicas do currículo. 

O lema elixido para este ano, LER CIENCIA NA BIBLIOTECA ESCOLAR, trata de sensibilizar sobre a importancia da lectura de textos de carácter científico, de textos divulgativos ou de textos literarios que tratan temas relacionados coa ciencia. Todos estes contidos teñen cabida na biblioteca e enriquecen a bagaxe lectora do alumnado. A ilustración é de PATRICIA CASTELAO.

Por outra parte, a incorporación do profesorado dos departamentos de ciencias aos equipos de biblioteca, diversifica as posibilidades de intervención da mesma e favorece o deseño de actividades plurais en contidos e imprescindibles para o desenvolvemento de todas as competencias básicas.

Chegou o outono

Para traballar nesta época de outono podemos atopar moita información NESTA PÁXINA    do colexio

   

Proxecto E-LBE, lectores electrónicos na nosa biblioteca.

O noso centro está incluído no proxecto E-LBE, polo que contará cun equipamento de 3 dispositivos de lectura electrónica que utilizaremos en función dos obxectivos do Proxecto Lector de Centro e coa orientación que o equipo de biblioteca crea máis oportuno. 

Achégase:

•  un díptico informativo e
• unha relación máis ampla de recursos electrónicos relacionados coa lectura dixital e o libro electrónico.

Resolución do PLAMBE

Que é o PLAMBE?

PLAMBE: PLAN DE MELLORA DE BIBLIOTECAS ESCOLARES.

Co obxectivo de facer realidade unha rede de bibliotecas escolares activa, a Consellería de Educación vén realizando desde o curso 2005/2006 unha convocatoria anual para incentivar o deseño e posta en marcha de novos proxectos educativos para a organización e dinamización da biblioteca escolar.

Os centros incluídos no Plan reciben orzamentos especiais para dotación de fondos, equipamentos informáticos e audiovisuais, mobiliario e gastos de funcionamento da biblioteca; ademáis pasan a formar parte dunha lista de correos PLAMBE a través da que reciben información e asesoramento, comparten  materiais e recursos, intercambian opinións; reciben unha formación específica e nalgunha das zonas reúnense periodicamente para poder manterse coordinadas.

Na actualidade e despois da novena convocatorio son 524 os centros incluidos no PLAMBE.

O noso centro incorporouse  no curso 2009-2010, na V convocatoria, e dende entón vimos recibindo uns orzamentos moi importantes que fixeron dar un impulso de mellora na nosa biblioteca que como todos sabedes ten o nome de BIBLIOSOÑOS.

Hoxe saiu no DOG a resolución definitiva:  

ACCESO DIRECTO AO TEXTO DE RESOLUCIÓN 

Todos os centros incluídos neste programa reciben axudas para  renovar os fondos da colección (sexa en formato impreso ou electrónico); á súa vez, os centros que se incorporan nesta convocatoria e os centros da convocatoria 2012 reciben axudas significativas para mellorar os equipamentos necesarios de cara á ofrecer servizos e realizar actividades propias das funcións que lle corresponden á biblioteca escolar: apoiar o desenvolvemento dos currículos en todas as áreas de aprendizaxe, formar lectores competentes, espertar o gusto pola lectura en todos os sectores da comunidade educativa (é dicir, servir de recurso fundamental ao desenvolvemento dos Proxectos Lectores de Centro);  contribuír a adquisición de competencias clave para o alumnado, como son a competencia de aprender a aprender ou a competencia mediática e informacional.  

Todas estas funcións están recollidas no artigo 113 da LOE e na normativa curricular vixente. 

Preparando o curso escolar

Estes primeiros días do curso son de preparativos, así na Biblioteca estamos revisando e preparando o PROXECTO LECTOR DE CENTRO E O PLAN ANUAL DE LECTURA.
Para unha maior información podedes ler a seguinte información:

Xa comezamos o novo curso

Xa comezamos o novo curso, reencontrámonos cos nosos compañeiros, coñecemos a outros novos, os nosos profesores e profesoras ensínannos as novas clases...estamos moi ledos, sobre todo na hora do recreo!.
Esperamos que sexa un bo curso!, teremos tamén moitas actividades na BIBLIOSOÑOS.
O tema para o Proxecto Integrado de Dinamizacións (P.I.D.) tratará sobre as Primeiras civilizacións: EXIPTO.

Actividade de Fin de Curso

Para rematar o curso o venres, 21 de xuño, todos a correr na III Milla "Pedrosa Latas". 

 

Obra de teatro no colexio

O xoves, 20 de xuño, o Obradoiro de Teatro do Colexio, dirixido por Vicente Míguez, puxo en escea a obra "Casa Macho".

No seguinte vídeo podemos ver unha reportaxe de fotos.

Actuación do grupo de teatro do colexio

O grupo de teatro do colexio, despois de moitos ensaios e posta a punto dos decorados, vestiario e outras necesidades para a representación, farán dúas actuacións:

• O xoves, 20 de xuño, no salón  de actos do colexio.
• O domingo, 23 de xuño, no Centro Social e Cultural "Carlos Adrán Cambón"  (Casa do Forno de Celeiro, con entrada libre para todo o público que desexe asistir.

MÁIS INFORMACIÓN NESTE ENLACE

Un premio no noso colexio

 MEMBROS DO XURADO, DO COLECTIVO CHILINDRÍN E GAÑADORES

A Asociación Cultural Penalba e o Colectivo Chilindrín presentaron o sábado, 8 de xuño, os carteis para a FESTA DA MERLUZA que se celebrará o vindeiro mes de xullo; ademáis entregaron os premios que recaeron en:

• Andrea Chao Ramos (autora do cartel anunciador), exalumna do noso colexio.
• Alumnos e alumnas de 1º de Primaria, xunto coa súa profesora Rebeca Palmeiro Chao, do CEIP Antonio Pedrosa Latas de Celeiro, que levaron o premio na categoría de Infantil.

Noraboa aos participantes e en especial aos gañadores!!!

Un libro moi especial!

A profesora Rebeca fixo este fermoso libro do poema de Gloria Fuertes " Doña Pitu Piturra".

ACTIVIDADES ESPECIAIS NO FIN DE TRIMESTRE

Estamos a rematar o 3º trimestre e con el tamén remataremos o curso, por iso estamos inmersos en multitude de actividades especiais que podemos ir vendo na páxina do  

Proxecto Integrado de Dinamizacións

LETRAS GALEGAS no colexio

O xoves, 16 de maio celebramos no colexio os Maios e Letras Galegas coas actividades que xa temos comentado:

• Actuación dos mariñeiros cantando cancións populares
• Actuación do novo coro de Celeiro, dirixido por Daniel Caxete
• Actuación do coro do Colexio estreando a canción "Amar o mar"

Clausura da Exposición

O xoves, 16 de maio, pola tarde, clausuramos a Exposición "Unha primavera de poemas".

As actividades para este día correron a cargo do coro do noso colexio. Cantámoslle a Rosalía de Castro e tamén unhas Cantigas Populares Mariñeiras.

Sesión de contacontos

O mércores, 15 de maio, na sala multiusos do Concello de Viveiro, lugar onde temos a exposición conxunta as bibliotecas Escolares da Mariña, houbo contacontos a cargo das mestras Angélica Novo e Rebeca Palmeira do CEIP Antonio Pedrosa Latas de Celeiro.
Pasamos unha velada moi entretida e divertida!

Inauguramos a Exposición "Unha primavera de poemas"

E, por fín, chegou o día da inauguración.
Os nenos e nenas dos diferentes colexios poideron ver os seus traballos e os doutros compañeiros.

A esta cita acudiron as comunidades educativas dos centros participartes e poidemos contar coa participación de Marta Coira, asesora do CFR de Burela, a Tenente de Alcalde, María Loureiro e como mestra de ceremonias, Carmen Ferreiro.

Os alumnos e alumnas do CEP Lois Tobío prepararon uns poemas de Rosalía de Castro e outros autores e recitáronnos acompañados por diversos instrumentos musicais. Fixéronno moi ben!

Semana das Letras Galegas

Durante o mes de maio estamos a levar a cabo moitas actividades relacionadas coas Letras Galegas.

Na Biblioteca comezamos coas sesións  de FORMACIÓN DE USUARIOS que nos serven para coñecer e aprender a manexar a páxina sobre ROBERTO VIDAL BOLAÑO e todo sobre as LETRAS GALEGAS.

O día principal de celebración será o xoves, 16 de maio, pois celebraremos conxuntamente a FESTA DO MAIO E LETRAS GALEGAS. Na seguinte presentación podemos ver o programa de actuacións.

Exposición en Viveiro

Dentro do proxecto da Biblioteca Escolar e en colaboración coas bibliotecas doutros centros da Mariña, levamos a cabo o proxecto:

“UNHA PRIMAVERA DE POEMAS: apadriña unha poesía”

Esta actividade ten como obxectivo a posta en valor da poesía como unha forma máis de literatura e moi importante na formación de hábitos lectores.

Unha vez que rematamos as diferentes exposicións nos centros o seguinte paso é facer unha exposición conxunta de todos os traballos, neste caso vaise facer en Viveiro, na Sala de Usos Múltiples da Casa do Concello.

O mércores, 8 de maio, preparamos a mesma e ultimamos as actividades que imos levar a cabo durante os días que vai estar aberta ao público (do 13 ao 16 de maio).

A inauguración será o luns, 13  e a clausura o xoves, 16 de maio, estará aberta en horario de 18:30 a 20:00 horas. Neses días tamén faremos sesións de contacontos, recitados de poemas dos "Cantares Galegos" de Rosalía de Castro (con motivo do 150 aniversario da súa publicación) e remataremos cantando xunto co Coro do CEIP Pedrosa Latas de Celeiro.

Entramos no mes das LETRAS GALEGAS

Unha vez rematado o MES DOS LIBROS (Abril) xa entramos no MES DAS LETRAS (Maio).

Imos facer moitas actividades e teremos unha páxina especial onde atopar moitos recursos que nos axudarán a coñecer ao homenaxeado deste ano ROBERTO VIDAL BOLAÑO.